الثلاثاء، 4 أغسطس 2009

استايلات للعبايات مع مصممة الأزياء إيمان عبد الحليم

استايلات جديدة للعبايات

مصممة الأزياء المعروفة / إيمان عبد الحليم



في البداية عايزين نعرف إيه اللي بيميز تصميماتك عن باقي مصممات الأزياء؟!
أنا خريجة فنون جميلة قسم ديكور، وكانت الأزياء المسرحية جزء من دراستي، وبعد التخرج استهواني مجال الأزياء خاصة إني كنت عاشقة لتصميمات "شمس الأتربي" لأنها كانت متأثرة بالروح الشرقية وروح الست المصرية الجميلة المحتشمة، وأول ما بدأت اشتغلت عباية، وبعد كده عملت أفكار جديدة لموديلات السواريه والمناسبات المختلفة، وأنا متميزة بالعباية الحديثة، وتصميماتي لا يوجد بها عري، فأنا ضد العري تماماً.

إزاي طورتي في شكل العباية؟!

أنا استطعت أن أحول العباية إلى فستان، فطورت في قصات العباية وشكلها، وغيرت في الألوان، وغيرت في أماكن التطريز.. كمان ممكن العباية تكون قصيرة شوية ومعها بنطلون، وقدرت كمان أصمم العباية بأكثر من تصميم يناسب كل الأذواق، واستوحيت أشكال العبايات من الذوق الإسباني والعربي.





فيه بنات مش محجبة بتطلب عباية؟!

بعد ما انتشرت فكرة العباية الشيك الحديثة البنات بدأوا يتعرفوا على شكلها الجديد والاستايلات الجديدة، ويشوفوا الموديلات، وأصبحوا يطلبوا عباية لحضور عقد قرانهم أو عيد ميلاد أو ليلة حنة وأحياناً السهرات.

إيه أفكار الموديلات اللي بتناسب مناسبات مختلفة غير الفرح والخطوبة؟!


في البداية لازم أسأل البنت المناسبة إيه؟ وفين؟ والساعة كام؟ وهل خاصة بيها ولا معزومة؟ لأن دي أسئلة مهمة جداً لأي عميلة بتعامل معاها، وعلى ضوء كده أسألها هي بتحب تلبس إيه؟... وبعد كده أبتدي أرسم لها الموديل على ورقة؛ فمثلاً لو عقد قران في الجامع ممكن أقترح عباية شيك تناسب جسمها وحجمها، أو ممكن نحول العباية إلى فستان وبنطلون مطرز، ويكون التطريز خيط وليس خرز، وبعد كده أقترح شكل الطرحة ولابد أن تكون الطرحة من نفس الموديل والتصميم, أما لو المناسبة في حديقة ممكن نعمل فستان فيه ألوان وورود، ولو عيد ميلاد ممكن يكون تونيك مطرز بالخيط، ولو ليلة حنة أفضل عباية مودرن وفي النهاية المكان والمناسبة بيوحي بالفكرة والموديل.




هل خامات وموديلات السواريه بتتغير من سنة إلى الثانية؟!

أولاً بالنسبة للخامات فهي ثابتة مثل (الشيفون – التفتا – الشانتونج – الستان) والجديد هو الألوان لأنها بتغير في شكل الموديل وخامته، وممكن أعمل شيفون مع خامة جديدة أو قماش مشغول وأدخله مع التفتا بالإضافة إلى أن قماش الخيش بدأ يأخذ نسيج مختلف ويتطور مع الخامات الأخرى؛ يعني الجديد هو تطوير الخامات مع بعضها بذوق المصمم..

أما بالنسبة للموديلات فأنا شايفة إن الفساتين المفتوحة انتشرت جداً لأننا عندنا هوس بالموديلات الأوروبية، لكن أنا أعتقد إن الفساتين المفتوحة سوف تنتهي قريباً وتعود الموديلات المقفولة في السواريه.

وإزاي بتستخدمي التطريز في تغيير شكل الموديل، وإيه خامات التطريز الحديثة؟!

أولاً أنا بهتم أكثر بالموديل في البداية، وبعد كده أفكر في التطريز مع ذوق العميلة، ونتشاور في أماكن التطريز، فممكن تكون في الكم, الظهر, الصدر, وخامات التطريز الموجودة في السوق زي خامات (الخرز) منتشرة جداً، لكن أنا بغير في شكل الغرز فهي التي تعطي الجمال... كمان باهتم بطريقة الظلال في الوردة وإزاي أطرزها من درجات الغامق إلى الفاتح بالإضافة إلى التركيز على (الاستراس) ولكن بالمقاسات الصغيرة جداً، فأنا ضد الأحجام الكبيرة في كل أنواع التطريز, بجانب الكريستالات بوظفها بطريقة معينة تناسب الموديل تماماً.




هل بتغيري في أماكن وضع التطريز غير المعتادة على الموديل؟!

حرفية المصمم إنه يختار أماكن غير مألوفة للتطريز وفي نفس الوقت تزيد من جماله، يعني مثلاً أنا مرة وضعت تطريز على جنب واحد من الفستان، وغيرت من شكله بالكامل، وعلى فكرة أنا دايما بركز جداً على تطريز الكم وعلى الذيل، وممكن أصنع التطريز على نصف الصدر، أو بعد الصدر، وحتى منطقة البطن أو نصف الفستان من تحت بالكامل أو الظهر كله فقط.
هل التطريز بيكون بديلا عن الإكسسوار؟!

أنا بعمل إكسسوار مصنوع خصيصاً للموديل، وبعتمد بشكل كبير على شراء الإكسسوار من تركيا لأنها بتكون على أعلى مستوى في تصميم الإكسسوار، ولكن أنا بحب الإكسسوار المصنوع خصيصاً، وعندي مصمم إكسسوارات خاص بتعامل معاه.
إيه الألوان المتركبة مع بعض وموضة جداً السنة دي؟!

أنا بعتمد على الألوان التي لا يتصور البعض أنها تتماشى مع بعضها، وهذا ما تعلمته من دراستي للألوان في الفنون التطبيقية...
فمثلاً الأورانج مع الطوبي، الموف مع السيمون بدرجات معينة، الأبيض مع الأصفر، والموف والرمادي، الأزرق مع العسلي، البستاج مع الطوبي.



إيه الألوان التي تناسب البشرة البيضاء والسمراء؟!

البشرة الخمري والسمراء بتحتاج إلى ألوان فوشيه، موف، ودرجات الزيتون، ودرجات البني، ودرجات الطوبي، والبشرة البيضاء بتناسبها كل الألوان، وأحب جداً إن الطرحة تكون من خامة الموديل ولونه وأفضل الطرحة الشيفون، وأحاول أوفق بين لون الطرحة مع الموديل من خلال التطريز، يعني مثلاً لو الفستان أخضر أعمل طرحة أوف وايت والتطريز يكون أخضر.
وإزاي بتغيري في شكل الموديل الأسود المشهور جداً في السواريهات؟!

أنا لا أقتنع باللون الأسود بمفرده، ولازم أدخل عليه أفكار جديدة أو تطريز بيغير من شكله نهائياً، أو أدخل أكثر من خامة لونهم أسود مع بعض وأفضل كمان قصات مختلفة داخل الموديل الأسود.




وأخيرا إزاي بتتعاملي مع عيوب الجسم والمناطق المليانة في تصميم السواريهات؟!
مهمة مصمم الأزياء الشاطر إنه يراعي العيوب الموجودة في الجسم
فمثلاً...

لو الصدر كان كبير....يبقى أفضل له القصة على شكل ( V ) المفتوحة ولو البنت محجبة أغطى حرف V بتول وتطريز, ولو مش محجبة أفتح الصدر حتى عضمة الكتف علشان أقص النسبة العالية في الصدر.

لو منطقة البطن والوسط مليانة...يبقى هختار القصات الواسعة على تحت لأنها بتكون مناسبة جداً للجسم العريض بالإضافة إلى الجيب (الورب) وأبعد تماماً عن (الصك)
لو الذراع مليانة... يبقى أبتعد تماماً عن نوعية القماش السميك وأشتغل الكم بالفيليه والشيفون الثقيل وممكن أعمل التطريز يكون بالطول وأبعد عن وضع الورود أو أشياء كبيرة على الكم.
ولو البنت قصيرة.... أبعد عن الفستان المكسي، ولازم الفستان يقف عن خلخال القدم علشان يعطي طول أو أقترح إنها تلبس فستان عند الركبة ويكون البنطلون مطرز أو بنطلون (ليجين) ونصيحتي للبنت المحجبة بالذات تبعد عن القصات الأمبير لأنها لا تناسب المحجبة نهائياً لأنها بتعطي شكل قميص النوم.

0 التعليقات:

إرسال تعليق

Popular Posts