الثلاثاء، 29 ديسمبر 2009

خطوط جريئة وألوان حيوية أزياء شتاء 2010 شبابية جداً

يتصدر الكاجوال رغبات بنات العشرينات ليظل هو المفضل ، لذا نجد أن أزياء شتاء 2009 -2010 اتسمت بالتنوع فى الألوان بالرغم من صدارة الأسود والرمادي خلال عروض الأزياء العالمية ، وفى النهاية الاختيار يرجع لكِ ولذوقك أثناء اختيار الملابس.









هذا الموسم يتربع اللون الأسود على عرش أزياء شتاء 2010 ، حيث يضيف هذا عمقاً لجميع الأزياء والألوان ، لذا يمكنك إضافة قطعة جديدة سوداء إلى أزيائك حتى تلائم خطوط أزياء هذا العام ، أما إذا كنتِ لست في حاجة لذلك ولديكِ ما يكفيكِ للتألق بهذا اللون بإمكانك إضافة "قميص" أو "هاي كول" لـ"لجاكت" أو "البالطو".





















ويأتى اللون الرمادي في المرتبة الثانية ، ويظهر بشكل قوي فى الجواكت و"السويت شيرت" ، ويؤكد خبراء الموضة أن هذا اللون يتناسب مع كل الألوان المشرقة .


















































كما تظهر مجموعة من الألوان الأخرى الباستيلية الفاتحة والهادئة أو المدموجة مع الألوان الأخرى مثل البيج والزهري والفوشيا ، أيضاً يمكنك ارتداء الألوان الفستقية والسماوية والزهرية أو اللون البترولي .















أما البنطلونات فظهرت هذا الموسم بكل الأشكال لتناسب الجميع ، وبعض الموديلات مستوحاة من طراز ملابس الفروسية والخيالة التاريخية القديمة يدخل بها الأحزمة العريضة.

الأربعاء، 23 ديسمبر 2009

وفرى وقتك مع لفات الطرح الجاهزه ... بالصور


تصميم يناسب البنت الجامعية

فكرة الربطات الجاهزة فكرة جديدة وعملية ومريحة وبتسهل على البنت لف الطرحة، وخصوصاً مع اللفات الصعبة والدبابيس اللي دائماً بتعمل مشكلة؛ لأنها مش بتثبت..

ودلوقتي ممكن أي بنت تختار أي شكل هي عايزاه من الطرح أو تطلب من مصممة الطرح تفصيلة معينة تتناسب معاها...

علشان كده قابلنا مصممة ربطات الطرح الجاهزة "مروة البغدادي" وهي واحدة من أشهر المتخصصين في تفصيل الربطات الجاهزة.. وسألناها..

ليه فكرتِ في تصميم ربطات جاهزة للطرح؟!

أنا اكتشفت إن البنات بتلاقي صعوبة في لف الطرحة بطرق مختلفة, وخصوصاً إن البنت المصرية مشغولة دايماً كطالبة في الجامعة أو كزوجة وأم وما عندهاش وقت تربط الطرحة.

علشان كده فكرت في تفصيل لفات جاهزة وسهلة واقتصادية وتسهّل عليها الوقت والجهد وفي نفس الوقت تلتزم بالشكل الإسلامي للطرحة؛ لأن تغيير الربطات بيغيّر في الشكل والحالة النفسية للبنت وتجعلها متجددة باستمرار، وكمان حبيت أن يكون لي إستايل خاص وابتكار يميّزني كمصممة لفات طرح؛ لأني باعتبر الحجاب ثقافة شرقية وليست موضة عالمية.

هل فيه خامات معينة من الطرح تتناسب مع تفصيل الربطات الجاهزة؟!

الخامة الأساسية هي "الليكرا" اللي نسبة القطن فيها بتكون عالية وده علشان تحافظ على سلامة الشعر، بالإضافة لأنها بتعطي نسبة من الثبات عالية جداً.. وعلشان كده مش بنحتاج لدبابيس كتير، وبعد كده باقوم بقصّ قماش الليكرا بأشكال مختلفة وبأكثر من تفصيلة علشان في النهاية البنت تختار الشكل والتصميم حسب ذوقها الشخصي وتأخذ الطرحة وتلبسها على طول من غير دبابيس.
والجديد دلوقتي إني بافكر إزاي أصمم الشيفون بطريقة تساعد البنت إنها تلفّه من غير ما تستخدم دبابيس أيضاً.

والبندانة كمان بتفصّليها مع الطرحة الجاهزة؟!

أنا ممكن أفصّل أكثر من بندانة مع الطرحة، وممكن كمان أعمل البندانة نصفين أو على شكل كروس، وكل ده بيتم عن طريق خياطة البندانة مع الطرحة.

طرحة جاهزة بالكوفية بتاعتها

إيه الرابطة الجاهزة والبسيطة والمناسبة لفصل الشتاء؟!

أنا صممت طرحة جاهزة بالكوفية بتاعتها.. يعني البنت تلبس الطرحة وباقي الطرحة هيكون كوفية وتلبسها من ورا وتلف لفة واحدة على الكحكة وتجيب الديل وتلفه داير ما يدور على رقبتها وهيظهر في الآخر وكأنها كوفية.

طيب عايزين نعرف إيه اللفات الجاهزة اللي بتناسب أحجام الوجه المختلفة زي المدور المليان مثلاً؟!

الوش المدوّر يستخدم الربطة من قدام ويجيب اللفة لقدام شوية علشان تصغر الوش؛ لأن فيه ميزة في القماش الليكرا اللي باستخدمه في الربطات الجاهزة وهو إنه بيرسم الوش.

اللفة البدوي الجاهزة

ولو بنت عندها المنطقة اللي تحت الذقن مليانة تعمل إيه؟!

ممكن تجيب اللفة من تحت ذقنها حتى لو الطرحة إسبانش؛ لأنها بتعمل نتيجة حلوة وبترسم الوجه وبتداري العيوب دي كلها.

وبالنسبة للوش الصغير؟!

بالنسبة للوش الصغير بنختار اللفة الجاهزة اللي بتكون منفوشة ومتصممة ببندانة ونجيب الطرحة على ورا.. وممكن كمان تضيق الطرحة من تحت الرقبة وتضيقيها كمان على الخد فيظهر الوجه كبيراً، وممكن تلبسي طرحة كاملة عادية تحت الطرحة الجاهزة.


طب ولو البنت عندها الجبهة عريضة.. تعمل إيه؟!

أحسن حاجة تعملها إنها تقطع الجبهة بالبندانة علشان تداري العُرض بتاع الجبهة بس تخلي بالها إن ما يظهرش جزء كبير من البندانة وتظهر وكأنها خط بسيط؛ لأن كده بيكون شكلها أشيك.

طيب هل فيه تصميم ممكن يناسب البنت في الجامعة؟!

فيه طرحة جيرسيه بني ومتخيّط عليها قطع من (الجينز)؛ لأن أغلب لبس البنات في الجامعة بيكون (جينز) ودائماً الجينز بيتناسب مع كل الألوان.


وشكل الطرحة الضفيرة عامل إزاي؟!

أنا باصمم الطرحة على شكل ضفيرة وكأنها تشبه الشعر بالضبط وأخيط فيها إكسسوار نحاسي بسيط، وبتتلبس على طول من قدام وبتتلف من ورا مع تغطية الرقبة.


وكمان فيه طريقة ثانية وهي إنها تتلبس من ورا زي البرنيطة أما الديل بيتلف على الكحكة والضفيرة تنزل على جنب.
وفي حالة لو الشعر قصير ممكن تتمسك بدبوس واحد بس يمسك الكحكة من ورا.

وهل ممكن الرابطة الجاهزة تتلف بأكثر من شكل؟!

ممكن طبعاً إنها تلبس الربطة الجاهزة عادي من قدام وتلفها لفة سريعة وخلاص.. أو تربط اللفة من وراء وتلف الطرحة على الكحكة مع مراعاة إنها تلبس هاي كول أو كوفية ومعاها إكسسوار ضخم.. أو تلبس الطرحة من ورا وتلفها على الكحكة وتسيب جزء منها تداري به الرقبة وتطلع به على الكحكة تاني وبعد كده ترميها على الكتف.

إزاي بتغيّري مِن شكل الطرحة السادة؟!

أنا "بكرمش" الليكرا بطريقة معينة علشان تعطي الشكل المجعد أو المكرمش، وممكن أقصّها من الآخر بطريقة مايلة شوية أو على شكل شرائط رفيعة وفي النهاية بتعطي شكل جميل ومش بتحتاج لأي طرحة ثانية معاها.

معروف إن اللفة البدوي بتحتاج أكثر من لفة.. إزاي صممتيها بلفة واحدة؟!

كل اللي عملته إني قمت بقصّ الطرحة على شكل مثلث وخيطت على طرف الطرحة إكسسوارات معدن.
والطرحة دي بتتلبس مرة واحدة وهي جاهزة تماماً مش بتحتاج تتلف.

ممكن تدخّلي أكثر من لون مع خامة الليكرا؟!

أنا بافضّل أدخل لونين أو ثلاثة فقط مع بعض زي البني مع الأحمر, والذهبي مع البنفسجي والبيج والذهبي وفيه كمان لون جديد اسمه "الجعراني" وهو التركواز المخضر، بالإضافة طبعاً إلى الألوان المعتادة وكل ما البنت تختار ألوان مختلفة جداً عن بعضها بيكون شكلها لافت وجديد.

وإيه الألوان اللي بتناسب البشرة السمراء بالذات؟!

أنا بالاحظ إن أصحاب البشرة السمراء والقمحية دائماً بيشتكوا إن الطرحة البيضاء والسوداء مش بتتناسب معاهم.
علشان كده فكرت إني أصمم الطرحة على لون "ميتال" أو لامع سواء بالنسبة للأبيض أو النحاسي أو الأسود؛ لأنها بتعكس الإضاءة على الوجه وتخليه يبان مشرق.. وفيه ألوان تانية بتكون حلوة جداً مع البشرة السمرة أو الخمرية زي الموف والبني والبيج.

بالنسبة للعروسة هل ممكن إنها تستغنى عن التاج مع الربطات الجاهزة؟!

أنا أفضل البونيه مع الطرحة القطعة الواحدة الجاهزة والبونيه بيكون ليكرا إستريتش ودي بتكون بديلا للتاج، وطبعاً لازم يكون شكلها متناسق مع روح الفستان.. وباخيط على البونيه فصوص ضخمة من الكسر والإستراس والألماظ، والذيل المتخيط مع البونيه هو البديل عن الطرحة وبتكون خامته ليكرا مشغول وبتتلبس مرة واحدة من قدام وده تصميم بديل عن الطرحة التول.

وأشكال الكروسات في السواريه بيكون شكله إيه؟!

أنا بافصّل الطرح الأساسية على شكل كروسات وأخيطهم مع بعضهم من ورا، والبنت بتأخذها مني جاهزة وتلبسها مرة واحدة ومن غير أي دبابيس..

وفيه شكل تاني وهو إني بافصّل الطرحة الليكرا الإسترتش وأخيط من جواها التول.. وأخيط كمان الإكسسوار على جنب وفي الآخر بـ"أنكشهم" مع بعض وباراعي طبعاً إني أجمع بين لونين من الطرحة زي الرمادي مع الفضي مثلاً.


Popular Posts