موضة شتاء 2010 بـ التريكو والصوف والكشمير

حلم كل بنت إنها تكون متميزة عن غيرها في اختيارها للموديلات، وشتاء 2010 بيسمح لك بتحقيق التميز، ده من خلال وجود تصميمات متنوعة بخامات متنوعة من التريكو والصوف والكشمير فهتلاقي في شتاء 2010...

البلوفر

بما إن الشتاء في مصر دافئ في معظم الأوقات فهتلاقي نفسك مش قادرة تستغني عن البلوفر... ده بالإضافة إلى إن البلوفر مناسب للبس في جميع الأوقات يعني هتقدري تلبسيه بالنهار وبالليل، وممكن إنك تلبسيه وإنت رايحة الجامعة أو وإنت رايحة الشغل، كمان ممكن تلبسيه على بنطلون قماش أو جينز أو جوب، يعني من الآخر كده بيناسب كل الأوقات وكل الأعمار... وطبعا أنت لما بتيجي تشتري البلوفر بتقعي في حيرة كبيرة لأنك مش عارفة تختاري شكل مناسب لجسمك؟! بس ولا يهمك حالاً هاقول لك إزاي ممكن إنك تختاري البلوفر المناسب...

إزاي تختاري البلوفر المناسب؟!

اختيار البلوفر بيكون على حسب شكل الجسم فمثلا...

• لو كنت قصيرة

يبقى لازم تبعدي عن البلوفرات المنسوجة بالعرض أو اللي فيها خطوط بالعرض لأنها هتخليكي تظهري بمظهر أقصر مما أنت عليه، وحاولي إنك تختاري البلوفرات المنسوجة بالطول أو اللي فيها خطوط طولية.

• لو كنت طويلة

يبقي ابعدي نهائي عن البلوفرات المنسوجة بالطول لأنها هتديكي طول أكتر، وحاولي تلجئي للبلوفرات المنسوجة أو المقلمة بالعرض.

• لو كنت ممتلئة القوام

يبقي ابعدي نهائياً عن البلوفرات اللي فيها نقوش عريضة وكبيرة وابعدي عن البلوفرات القصيرة لأنها هتبيّنك أكثر امتلاء مما أنت عليه، واختاري البلوفرات متوسطة الطول، وابعدي نهائياً عن البلوفرات الضيقة واختاريها واسعة علشان تداري امتلاء جسمك، واختاري الألوان الغامقة وابعدي عن الألوان الفاتحة.

• لو كنت رفيعة أو صاحبة قوام مثالي

يبقي مش هتلاقي مشكلة في اختيار البلوفر لأنك هتلاقي إن جميع الأشكال والتصميمات مناسبة ليكي جدا.

موضة البلوفرات

الشتاء ده بالذات نازلة فيه تشكيلة متنوعة من البلوفرات سواء من حيث التصميمات أو الخامات فهتلاقي البلوفر الطويل والقصير المفتوح والمقفول.. والمقفول على شكل V أو على شكل دايرة صغيرة أو كبيرة، والبلوفر اللي بكم والبلوفر اللي بـ 3/4 كم... كمان هتلاقي خامات متنوعة منها الصوف والتريكو والكشمير، وزي ما البلوفر القطيفة اختفى في شتاء 2009 برضه هتلاقيه مختفي بشكل كبير في شتاء 2010.

ومن حيث الألوان هتلاقي ألوان متعددة زي الأحمر والبني بدرجاته المختلفة والموف والرمادي والبيج بدرجاته المختلفة والبترولي، وفيه بلوفرات سادة ومنقوشة؛ بالإضافة إلى الألوان الجرئية زي الأصفر والأخضر الزراعي والبرتقالي والأزرق.

الفستان الطويل

زي ما التريكو والصوف والكشمير موجودين في تصميم البلوفر هتلاقيهم كمان موجودين في تصميم الفستان الطويل اللي بيصل طوله إلى منطقة الركبة واللي كان موجود زمان في السبعينات وظهر بقوة منذ سنتين، ومعاه هتحتاجي إنك تلبسي بنطلون تحت الفستان أو جاكيت طويل وبوت طويل، وطبعا تراعي إن أي حاجة هتلبسيها يكون لونها متناسق مع لون الفستان، وطبعا مش محتاجة أقول لك إن الفستان الطويل بيناسب فقط البنات اللي جسمها مثالي يعني لا هي رفيعة ولا مليانة.

الكوفية

الكوفية من القطع المكملة للشياكة في شتاء 2010، وتقدري إنك تلبسيها في أي وقت من الأوقات سواء بالليل أو بالنهار، وتقدري كمان إنك تلبسيها على أي لبس سواء كان كلاسيك أو كاجوال، وللكوفية أشكال متنوعة فهتلاقي الكوفية السادة والكوفية المنقوشة والكوفية الكاروهات والاختيار في النهاية بيرجع ليكي أنت ولذوقك، بس طبعا لازم تاخدي بالك إن لون الكوفية يكون متناسق مع لون ملابسك...

الشال

دلوقتي الشال أصبح من قطع الإكسسوار الأساسية اللي ما فيش بنت تقدر إنها تستغني عنها في الشتاء، وده طبعا على عكس المقولة اللي كانت منتشرة زمان وهي "إن الشال موضة للسيدات الكبار في السن بس"... وبكده تقدر أي بنت رايحة الجامعة أو شغلها أو خارجة آخر اليوم إنها تلبس بادي أو بلوفر قصير وتلبس من فوقه شال.

بس برضه لازم تاخدي بالك إن لون الشال يكون مناسب للون اللبس اللي أنت لابساه.. وعلى فكرة ممكن إنك لو عندك شال قديم وعايزة تجددي من شكله ممكن إنك تجيبي خرز وتحطيه على الشال، بكده هتجددي من شكل الشال القديم اللي عندك، وعلى فكرة فيه أكتر من طريقة للف الشال على الكتف.

وبكده تقدري فعلا إنك تتميزي في شتاء 2010 بمجموعة متنوعة من التصميمات والخامات