بالخطوات.. اعملي بنفسك ماكياج رقيق

تحضير البشرة قبل الميك أب

أهم حاجة لازم تعملها أي بنت قبل ما تحط الميك أب إنها تجيب قطنة فيها تونيك أو ماء ورد علشان تشيل أي شوائب أو تراب أو آثار ميك أب ممكن إنها تكون موجودة على البشرة علشان ننظف البشرة ونحضّرها للميك أب، ده غير إن ماء الورد بيمنع ظهور التجاعيد المبكرة في البشرة وبيقفل المسام.

وبعد تنظيف البشرة يُفضّل وضع كريم مرطب سريع الامتصاص؛ لأنه بيرطب البشرة وفي نفس الوقت بيغذي البشرة وبينوّر الوش ويفتحه، وطبعاً بالنسبة لخروجات الصبح اللي بيروحوا الجامعة لازم يحطوا صن بلوك (واقٍ من الشمس)، ويُفضّل إنها ما تكترش الصبح الميك أب خالص يعني تحاول تحط أقل حاجة ممكنة علشان يكون شكلها طبيعي وهادي.

مشاكل البنات مع الكونسيلر (مصحح العيوب)

فيه بنات كتير بتسأل وبتقول إن الكونسيلر بيشقق أو بيقطع تحت العين، وعلشان تعالجوا المشكلة دي لازم نوزّع اللوس باودر "بودرة سايبة" تحت العين بعد الكونسيلر، واللوس باودر دي دورها إنها بتثبت الميك أب سواء كان كونسيلر أو كريم الأساس، ولازم نفرّق كويس أوي بين البودرة السايبة والمضغوطة؛ لأن البودرة المضغوطة بتستخدم لإزالة الدهون الزايدة وفي تصليح الميك أب.

كمان فيه بنات كتير بتستخدم درجة كونسيلر فاتحة جداً عن لون بشرتها وده غلط؛ لأنه بيظهر منطقة تحت العين فاتحة جداً وبيكون شكله مش مناسب خالص، وخصوصاً في ضوء النهار لأن الضوء ده بيكشف تفاصيل الوجه بالظبط.

تحديد العين بالكحل

بعد ما وزعنا الكونسيلر واللوس باودر تحت العين هنبدأ بعد كده في تحديد العين من فوق بقلم الكحل، ولازم ناخد بالنا إن القلم اللي هنستعمله يكون ناعم وطري ومبري كويس علشان ما يجرحش العين.

بنرسم بالقلم من فوق العين من الخارج للداخل وما نكملش لغاية آخر زاوية العين الداخلية، وزي ما هنشوف في الفيديو إننا اختارنا لون الكحل البني؛ لأنه مناسب مع لون البشرة الخمرية ولون الشعر ولون العينين، وده هيدينا في الآخر شكل طبيعي وهادي.

رسم العين بالآي شادو

بعد كده نرسم العين بالآي شادو على الجفن المتحرّك على الجزء اللي فوق خط القلم اللي رسمناه بالظبط، ونبتدي نسيّحه بالفرشة من الداخل للخارج بطريقة بسيطة.

ولازم كل بنت يكون عندها الفرش الخاصة بمزج الآي شادو ودي بتكون موجودة في محلات بيع مستحضرات التجميل وفي الصيدليات، والفرش دي بتساعد البنت جداً، وبتخلي رسم العين بالآي شادو سهل.

شادو مضيء تحت الحاجب

بعد ما رسمنا العين بلون الآي شادو الأساسي واللي بيكون مناسب مع لون بشرتنا وملابسنا بنبدأ نحط لون مضيء تحت الحاجب؛ علشان نبرز عضمة الحاجب، وممكن نحط كمان عند الزاوية الداخلية للعين لأن الطريقة دي بتدي إضاءة وإشراق للعين.

رسم الحواجب

لما نيجي نرسم الحواجب يُفضّل إننا نستخدم شادو أو بودرة مخصوصة للحواجب؛ لأن القلم مع الوقت الطويل بيوقّع شعر الحواجب، وفيه دلوقتي ماركات أقلام عالمية بنستخدمها بإننا نبلها بنقطة ميه ونرسم بها العين كإننا بنرسم ببودرة.

ونصيحة لكل البنات علشان يعرفوا يرسموا حواجبهم بشكل طبيعي ومناسب مع شكلهم يا ريت بلاش نرسمهم باللون الأسود ونختار اللون المناسب مع لون شعرنا وبشرتنا، وكمان بنرسم على الحواجب بفرشة خاصة بتكون رفيعة جداً، وبنرسم بالفرشة دي بزاوية صغيرة جداً زي ما هنشوف في الفيديو؛ علشان ما تخليش الحاجب أتخن من الطبيعي وبالتالي ما تغيرش من شكلنا الطبيعي.

تحديد العين

علشان نبرز رسمة العين ونديها شكل جذاب بنستخدم "آي شادو" غامق وبنحطه عند الزاوية الخارجية للعين، وبندخل على جوه بزاوية بسيطة علشان نبرز كسرة العين، وبعد كده وقت رسم العين بالكحل بس في المرحلة دي لازم ناخد بالنا إن..

العين الضيقة..

يُفضّل إننا نستخدم لها كحل فاتح جوه العين زي الأبيض أو الأخضر؛ علشان تفتح العين، وممكن نحط من بره ألوان زي البني أو الرمادي.

العين البارزة..

بيكون حلو معاها جداً الكحل الغامق جوه العين، لكن مش لازم نزوّد كحل فوق أو تحت العين؛ لأن ده بيخلي العين تبان جاحظة.

العين المُجهدة..

يُفضّل إننا نرسم بقلم أسود تحت العين علشان يداري الإحمرار والإرهاق اللي جوه العين، ولازم نهتم جداً باختيار قلم الكحل إنه يكون ماركة كويسة ومش بتسيح.

وبعد ما خلصنا رسم العين بالآي شادو وتحديدها بالكحل ممكن نجيب البيبي كوتون ودي بتكون موجودة في الصيدليات ونحدد بها العين من النهاية بلون بني، ونحاول إن المنطقة دي ما تكونش محددة أوي يعني شكلها يكون مموه ومش بنقفل العين كلها والطريقة دي بتدي بساطة للعين وبتوسعها.

الآي لاينر

بنرسم من فوق العين بخط آي لاينر رفيّع خالص بنمشي به على جذور الرموش من فوق وبنسحبه لبره شوية، وده بيعمل شكل كثيف للرموش، ودي طريقة أي بنت ممكن تعملها لنفسها، ولو مش بنعرف نرسم بالآي لاينر ممكن نعمل نفس الحكاية بقلم كحل بس يكون سنّه رفيع.

كريم الأساس بلون البشرة

لازم نختار لون الأساس بتاعنا بعناية جداً، يعني ما ينفعش نحط لون كريم أساس أفتح من لون بشرتنا بخمس درجات مثلاً ودي مشكلة بنلاحظها في بنات كتير.

ولو أي بنت عايزة تفتح لون بشرتها؛ فممكن إنها تستعمل لون كريم أساس أفتح من بشرتها بدرجتين على الأكثر.

أما لو هي فاتحة وعايزة تغمق بشرتها أو لو عندها كريم أساس فاتح وعايزة تخليه يبان مش فاتح أوي ممكن تغمقه بإنها تستخدم أحمر خدود برونزي على الوش كله؛ لأنه بيعمل درجة حلوة وبيغمّق اللون شوية.

ويا ريت نبعد عن درجات الروز في كريم الأساس؛ لأن إحنا بطبيعتنا خمريين وبيمشي معانا أكتر درجات البيج.

ولو إحنا خارجين الصبح يا ريت ما نكترش خالص من كريم الأساس اللي هنحطه على بشرتنا؛ علشان الشكل يكون طبيعي ومناسب مع الصبح.

ماسك طبيعي لنضارة البشرة

فيه ماسك مفيد جداً وممكن كل البنات تعمله قبل الميك أب علشان تحافظ على نضارة وإشراقة بشرتها وهو ماسك "بياض البيض وعسل النحل والليمون"، والماسك ده مفيد جداً للبشرة بيعالج مشاكل كتيرة جداً في البشرة وبيشدها، وبيخلي شكلها ناعم وصافي وبيضيّق المسام وبيحافظ على نضارة وإشراقة البشرة.

البلاشر (أحمر الخدود)

هنيجي لخطوة توزيع البلاشر وفي الحالة دي هنختار لون روز حفيف علشان ينوّر البشرة ويخليها مشرقة.

تصليح عيوب الأنف بالبلاشر

لو أي بنت عندها مشكلة أو عيب في منطقة الأنف؛ زي إنها تكون عريضة شوية، ممكن نعالجها بإننا ندمج الغامق مع الفاتح واللي بيعتمد على فكرة الظل والنور.

الماسكرا

الطريقة الصحيحة في وضع الماسكرا على الرموش هي إننا نبدأ من الجذور لفوق علشان الرموش تترفع وتطول، وبعد كده نسحب الرموش على بره شوية.

وفيه أنواع ماسكرا كتيرة منها اللي بتطول أو بتكثف أو بتعمل الاتنين مع بعض، بس أهم حاجة وإحنا بنختار الماسكرا إننا نختار الماسكرا اللي بتتقل وبتدي طول وكثافة ولون للرموش.

أحمر الشفاه

بعد ما خلصنا الماسكرا بنحط أحمر الشفاه وبنختار لون هادي مناسب مع الصبح، وممكن نكتفي بإننا نستخدم قلم تحديد لونه هادي، وبنحدد ونملى به الشفايف كلها، وبعد كده نحط الليب جلوس (ملمع الشفاه).

بلاش المستحضرات الرخيصة

وبعد ما خلصنا الميك أب أحب أنصح كل بنت إنها علشان تحافظ على بشرتها لازم تبعد خالص عن المنتجات الرخيصة والمقلّدة؛ لأن المستحضرات دي بتعمل مشاكل كتيرة في البشرة وبتدمرها وبتتسبب في ظهور الحبوب، وكمان لما البشرة بتتعرّض للشمس بتعمل بقع في البشرة.

إزاي نعرف إن مستحضرات التجميل فيها مواد مسرطنة؟!

بنسمع كتير إن في بعض مستحضرات التجميل بيضاف عليها مواد مسرطنة علشان تزوّد فترة صلاحيتها.

ودي طريقة سهلة أوي ممكن كل البنات تعملها علشان تعرف إذا كان المستحضر اللي هي بتستعمله فيه مواد مسرطنة ولا لأ؟!

كل اللي عليها إنها تدهن المستحضر سواء كان روج أو كريم أساس على أي حاجة دهب عندها، ولو لقينا الدهب ظهر عليه لون أسود نعرف بكده إن المستحضر فيه مواد مسرطنة.. وعموماً فيه بعض مستحضرات التجميل ممكن تعد فترة طويلة عندنا زي البلاشر والآي شادو، لكن الماسكرا والروج والآي لاينر والأقلام فأقصى مدة صلاحية لها هي سنة.